كل سنة بنعيد نفس القصة… “وين بدنا ناكل؟!” وبتبلش طوشة الاقتراحات بين اللي بدهم مشاوي، واللي نفسهم يجربوا شي جديد، واللي بدهم بس مكان فيه قعدة مرتبة وجو حلو. عشان نريحك من وجع الراس، جمعنالك قائمة بأحلى أماكن عمّان اللي بتناسب كل الأذواق والمزاجات، من الفطور للعشا، ومن القعدات الهادية للسهرات الحماسية!

إذا نفسك بمشاوي بتذوب بالتم، وبتحب الطعم الشرقي الأصيل مع لمسة فخامة، جبران هو المكان. المشاوي مش أي مشاوي، الشاورما بتاخد العقل، والمقبلات مشبّعة بالنكهات اللي بتخليك تحس كأنك بأحسن مطعم لبناني. المكان كمان متوازن من ناحية الجو—لا رسمي بزيادة ولا كاجوال بزيادة، فمثالي كواحد من أفضل أماكن لغداء العيد، سواء مع الأصحاب أو حتى عزومة مرتبة.

إذا كنت من النوع اللي بحب ياكل وهو مروّق، كرمز بيسترو هو المكان اللي لازم تروحله. الفايب؟ هدوء وأجواء أوروبية مع لمسة أردنية دافئة. الأكل؟ فطور مرتب لكل اللي بعرفوا قيمة الصبح، غدا مليان نكهات، وعشا يخلّص يومك بأحلى طريقة. من المخبوزات الطازة اللي ريحتها بتسبقها، للأطباق اللي كل لقمة فيها محسوبة، كرمز بيضبطك من أول النهار لآخره، ويعتبر أحد أفضل أماكن لغداء العيد مع العيلة لمحبي الراحة والأجواء الدافئة.

إذا حابب تاخد معدتك بجولة من بيرو للبرازيل للمكسيك بنفس القعدة، كاسا هو الخيار الصح. هون، مش رح تلاقي الأكل اللاتيني التقليدي اللي متعود عليه، كمان رح تجرب فيوجن بأفكار جديدة ونكهات غريبة بس خرافية. كل لقمة بتحكيلك قصة، والمكان كله طاقة وحيوية كأنك داخل على حفلة لاتينية فيها موسيقى، ألوان، وأجواء بتخليك تنسى إنك بعمان. لو بدك مكان لغداء العيد لكن بتجربة غير تقليدية، هذا هو العنوان.

ويلو هو المكان اللي بجمع بين الراحة والأناقة، مثالي لأي حدا بدو وجبة فيها جودة وفايب دافئ بنفس الوقت. سواء كنت قاعد بالحديقة الخضراء أو جنب المدفأة بالشتاء، التجربة دائماً ممتعة. الأطباق؟ مزيج من المطبخ العالمي بنكهة محلية، من الساندويشات الذكية للستيكات المشبعة، وكل شيء معمول بحب وتفاصيل بتخليك ترجع مرة ومرتين. إذا بدك غدا عائلي مميز بجو رايق وأنيق، وواحد من أماكن لغداء العيد مع العيلة اللي بتظل بالذاكرة، ويلو لازم يكون على قائمتك.

جايا هو المكان اللي بتروحله لو مزاجك رايق وما بدك تطلع من القعدة بسرعة. بتبلش ببرنش مرتب على الصبح، أو ممكن توقف فيه لسهرة خفيفة قبل العشا، مع أطباق خفيفة ومشروبات مميزة. القعدة مريحة، الديكور أنيق، والأجواء فيها نوع من السحر اللي بخليك ما تحس بالوقت. كواحد من الاماكن المميزة لغداء العيد، جايا مثالي إذا بدك مكان رايق وفيه لمسة sophistication.

إذا بدك سهرة فيها حماس وطاقة، ميرفيز هو عنوانك. هو مش مجرد آيريش بب، هو تجربة كاملة لمحبي الروك والموسيقى الصاخبة. المكان دايماً مليان حياة، فيه دي جي وموسيقى حية، وشاشات كبيرة لكل الأحداث الرياضية، يعني سواء رايح تسهر أو تتابع مباراة مع الشباب، رح تنبسط. الأكل زاكي، الجو شبابي، والطاقة فيه ما بتنزل تحت مستوى “حماس 100%”. وحتى لو كنت بدور على أماكن لغداء العيد مع العيلة بأسلوب مختلف، رح تلاقي وجبات تشبع كل الأذواق.

إذا بدك تبدأ نهارك بفطور ملكي أو كاسة قهوة وإطلالة خرافية، أو بدك تنهي يومك بسهرية هادية على السطح مع مشروب منعش، فهاي جاردن هو المكان الصح. الروف توب هذا ما إلُه مثيل، فيه vibes عالمية، والطعام بيخلط بين الشرق والغرب بأسلوب مميز. الأطباق مُبتكرة، الكوكتيلات معمولة بمكونات طازة، والإطلالة بتخليك تحس إنك عايش فيلم أوروبي بعمان. ببساطة، أحد أفضل أماكن لغداء العيد مع العيلة في أجواء راقية ومميزة.

إذا كان غداء العيد مع العيلة هو فرصتك للاستمتاع بقطعة لحم مطهوة بإتقان، فلوكا ستيك هاوس هو المكان اللي لازم تروحله. هنا، كل شيء مدروس، من اختيار أفضل قطع اللحم إلى طريقة الشواء اللي تخلي كل لقمة تذوب في الفم. الجو أنيق ومريح بنفس الوقت، والخدمة بتخليك تحس كأنك ضيف مميز من أول ما تدخل. سواء كنت بتدور على وجبة غداء فاخرة أو تجربة ستيك استثنائية، هذا المكان بيرفع مستوى اللحوم لمستوى جديد.

إذا بدك تعيش تجربة الأكل اللبناني بأصالته، كرم بيروت هو العنوان. المكان بيعكس كرم الضيافة اللبنانية بكل تفاصيله، من المقبلات اللي بتنزل عالطاولة بسرعة البرق، للمشاوي الطرية، وللحلويات اللي بتخليك تنهي الوجبة بابتسامة. هون، الحمص مش أي حمص، والتبولة مش مجرد سلطة، كل لقمة محضّرة بوصفة تقليدية غنية بالنكهات. إذا بدك أماكن لغداء العيد بطابع لبناني أصيل، هذا هو المكان اللي بترتاح فيه العيلة كلها.

الشيف علي الغزاوي، الفائز بـ “توب شيف”، قرر يعمل مطعم بأفكار جريئة، يجمع بين النكهات الشرقية اللي كلنا بنحبها، لكن بطريقة إبداعية ومودرن. الأكل شرقي، بس مش اللي متعودين عليه، وكل طبق إله قصة ورحلة. المكان مثالي للناس اللي بتحب تذوق شيء مختلف بس يظل مألوف، مثالي لغداء العيد لعشاق التجارب الذوقية الفريدة.

أول مطعم صيني بالأردن من سنة 1975، يعني قبل ما معظمنا يجي عالدنيا. المكان كلاسيكي، الأكل أصلي، وكل لقمة بتحسها مليانة ذكريات عمان القديمة، بس الأكل فيه أصلي وبيخليك تحس كأنك في بكين. إذا كنت من عشاق الأكل الصيني وبدك مكان لغداء العيد مع العيلة بنكهة شرقية آسيوية، فهنا رح تلاقي المطلوب.

من سنين كتير، برج الحمام حافظ على سمعته كواحد من أفضل المطاعم اللبنانية في عمّان. الحمص الكريمي، المشاوي المنهنهة، والمأكولات البحرية شيء مش طبيعي. المكان راقي بس ما بتحس حالك مقيد، يعني سواء بدك غدا مع العيلة أو قعدة مع الأصحاب، التجربة رح تكون ولا أروع.

---

عيد مبارك تيبسترز!

Lemur Love,

The Tip n’ Tag Team