إذا حدا استغرب إنك بتاكل الشوكولاتة من الصبح، ذكّره إنه اليوم العالمي للشوكولاتة. يعني اليوم الوحيد اللي عبارة “رح آخذ حبة بس” بتنتهي فيه غالبًا بـ “خلص… بما إن العلبة انفتحت”. سواء كنت من عشاق البرالين، أو الفواكه المغطسة بالشوكولاتة، أو الترافل اللي إله جمهور لحاله، هاي الأماكن بتعرف كيف تدلّعك.

إذا الشوكولاتة إلها أزياء راقية، فهي عند لا روش. كل قطعة معمولة بإتقان وحرفية، بتفاصيل بتخليك توقف شوي قبل أول لقمة. من أول ما تفتح العلبة لآخر قطعة، بتحس إنك قدام تجربة كاملة، مش بس حلو. سواء جاي تدلل حالك أو تدور على هدية مرتبة، لا روش دايمًا خيار برفع المستوى.

في هدايا بتقول “تذكرتك”… وفي علبة من فرسان للشوكولاتة بتقول “ذوقي ما عليه حكي”. معروفين بتشكيلاتهم المرتبة وتغليفهم الأنيق، وكل بوكس معمول بطريقة بتخلي أي مناسبة أحلى، سواء عيد ميلاد، زيارة، أو حتى مكافأة بسيطة بعد أسبوع طويل. وإذا كنت محتار شو تجيب، هون غالبًا ما رح تطلع بإيدك فاضية.

زي ما الاسم بيوحي، شوكولوجرافي بتتعامل مع الشوكولاتة كأنها لوحة فنية. كل قطعة فيها تفاصيل ولمسات إبداعية، وبتجمع بين الطعم الحلو والشكل اللي بخطف العين. وغالبًا… كاميرتك رح تذوق قبل إنت.

غانوتي بعرف إنه شكل العلبة جزء من التجربة. كل بوكس مرتب بعناية، وفتحه لحاله متعة. النكهات متنوعة، والتقديم أنيق، وكل قطعة بتحس إنها معمولة باهتمام. المشكلة الوحيدة؟ إن العلبة بتخلص أسرع مما كنت متوقع.

جاي من فرنسا ومعه خبرة طويلة بعالم الشوكولاتة. ترافل ناعم، برالين فاخر، وخيارات كثيرة لدرجة إن الاختيار بصير أصعب من المتوقع. عشان هيك البوكسات المشكلة موجودة.

في شوكولاتة بتنأكل بسرعة… وفي شوكولاتة بتوقف تتأملها شوي قبل ما تختفي. بارفي بتقدم قطع مرتبة بطريقة أنيقة، ومثالية إذا بدك تهدي حدا… أو تدلل حالك.

التمر لحاله مميز… بس لما يلبس شوكولاتة بصير قصة ثانية. بتيل بجمع بين تمره الفاخر والشوكولاتة بطريقة غنية وأنيقة، والنتيجة؟ صعب جدًا تكتفي بكم قطعة.

كلوا شوكولاتة بدون تأنيب ضمير اليوم يا تيبستيرز!

حب اللّيمور،

فريق تيب ن تاج