سواء داخل على جو نوادي رياضية لأول مرة، أو بدك توصل لمرحلة لياقة عالية، أو حتى مشترك بس عشان “أبدأ من الأسبوع الجاي” (عارفينكم)، مشهد الرياضة بعمان صار قوي جدًا. من أندية فخمة، لجيمات حديد جدّية، لاستوديوهات صغيرة بتخلي التمرين أخف شوي، هاي الأماكن بتعطيك أكثر من مجرد أجهزة ومرايا.

إذا بدك تتمرن في نادي رياضي وإنت شايف المدينة تحتك وكل تمرين كأنه لقطة فيلم، ماجما بيعطيك هالإحساس. الجيم كبير على أربع طوابق، فيه أجهزة حديثة، مسار مشي على السطح، خدمات نقاهة وتغذية، تدريب شخصي، وأكثر من ٥٠ حصة بالأسبوع.

هايف من الأماكن اللي بتدخل تتمرن وبترجع تلاقي حالك ضليت نص اليوم هناك. فيه مسبح، جاكوزي، حصص جماعية، مناطق تدريب وظيفي، وكارديو وحديد بمساحات كبيرة.

إيليت لاب من نوادي رياضية المعمولة للي بحبوا التمرين يكون مركز وجدي. أجهزة حديثة، مساحات تدريب وظيفي، وتدريب شخصي لكل المستويات.

ماي ترايب مش بس جيم، هو جو جماعي. فيه يوغا، حديد، وتمارين هوائية، وكل الجو فيه بيخليك تلتزم بدون ما تحس.

أبولو بيعطيك فخامة مع تمرين بنفس الوقت. أجهزة حديثة، حصص جماعية، تدريب شخصي، وكافيه صحي، وكل شي فيه مرتب ومريح.

فاي بوتيك مكان مخصص للنساء، فيه بيلاتس، بار، دراجات، تمارين عالية الشدة، وخدمات استرخاء. الجو فيه هادي ومرتب ومريح.

غولدز جيم من الأماكن الكلاسيك بعمان. فيه كل إشي: حديد، كارديو، مسبح، حصص جماعية، وأقسام منفصلة للرجال والنساء.

بروجكت زيرو ون جيم بوتيك جوه جدي كتير، كل الناس هناك هدفها واضح. تدريب قوة، لياقة، وتمارين وظيفية بجروبات صغيرة بدون إلهاء.

تمرّنوا منيح، يا تيبسترز!

حب الّليمور، فريق تيب اند تاج