لوحة الأفكار تبعتكم على بنترست كانت مستنية هاللحظة! سواء بدكم تجربوا تشتغلوا بالطين، أو تتعلموا مهارة جديدة من الفنون والأشغال اليدوية، أو تعملوا إشي بإيديكم وتاخدوه معكم عالبيت، أو حتى تقضوا كم ساعة بإشي أمتع من التمرير على التلفون، عمّان فيها ورشات إبداعية بتستاهل التجربة.

داخل بيت تراثي من ثلاثينيات القرن الماضي في جبل اللويبدة، جيلجامش بحوّل الشغل بالإيدين لتجربة كاملة. ورشاتهم العملية بتشمل كل إشي من الفخار والرسم على الزجاج، للزجاج الملوّن، وراكو، وكورينوكي، وكينتسوغي، والمبتدئين مرحّب فيهم كمان، وبالنهاية بتاخدوا القطع اللي صنعتوها معكم عالبيت.

ورشات فنون كولكتيف بمثابة ملعب لكل حدا بحب يصنع إشي بإيديه. عندهم تجارب بإرشاد مختصين بتشمل الرسم على الفخار، وتشكيل الطين، والفسيفساء، والطباعة الفنية، والرسم على القماش، وأنشطة للأطفال كمان، وكل هاد من غير ما تحتاجوا أي خبرة سابقة.

إذا جملة «من زمان نفسي أتعلم أرسم» قاعدة بقائمة مهامكم من الأزل، اعتبروها إشارتكم. مدرسة ذا آرت هَب للفنون بتقدم دورات منظمة بتقنيات فنية مختلفة، بالإضافة لورشات تشكيل الفخار على الدولاب، وتشكيله بالإيد، والرسم على الفخار، والرسم على اللوحات، وغيرهم.

هاي فرصتكم ترسموا على الفخار من غير ما تاخدوا الموضوع بجدية زيادة عن اللزوم. في مقهى ريمينيكن، بتختاروا قطعة خزفية، وبتلونّوها على راحتكم، وبتتركوا التزجيج والحرق إلهم… والمقهى بتكفّل بالمشروبات، وإنتوا بتتكفّلوا بالقرارات الفنية.

للي بدهم يحوّلوا هوايت الفنون لمهارة جدية، مركز مريم بيوفر مساحة مخصصة للرسم والتعلّم الإبداعي. خيار مناسب خصوصاً إذا كان مفهومكم عن الفنون والأشغال اليدوية أقرب لتطوير مهاراتكم وتقنياتكم، مش بس صنع إشي لطيف لقعدة العصر.

انسوا فكرة شراء الفخار… اعملوه بإيديكم! جلسات الفخار بتعطيكم فرصة تشتغلوا بالطين، وتصمموا قطعكم الخاصة، وتعيشوا التجربة بكل تفاصيلها. خيار ممتع للأصحاب، وللثنائيات، ولكل حدا مقتنع إن شوية طين على الملابس جزء أساسي من العملية الفنية.

آرتيريز ستوديو بيوفر مساحة إبداعية لمحبي الفن، ومكان يغيّروا فيه روتين القهوة والتلفون المعتاد. سواء جايين تكتشفوا هواية جديدة أو بس بدكم عذر تعملوا فيه إشي بإيديكم، التجربة تغيير لطيف عن استهلاك المحتوى طول اليوم.

درب للمهارات الحياتية بأخذ فكرة «بدي أتعلم هواية» بجدية، وبقدم دروس إبداعية للكبار والأطفال بتشمل الفخار، والخزف، والفسيفساء، والرسم، ومهارات عملية ثانية. من الأماكن اللي ممكن تروحوا عليها وتحكوا «بس بدي أجرب إشي جديد»، وبعدها بدقايق تلاقوا حالكم بتسألوا: «طيب، إمتى الحصة الجاي؟»

---

يلا، ورّجونا إبداعاتكم يا تيبسترز! 🎨

حب الليمور،

فريق تيب ن تاج