مرات بدك بيتزا، ومرات بدك باستا، ومرات بدك تلف السباغيتي بالشوكة بكل دراما كإنك بطل فيلم إيطالي. والحلو إن عمّان فيها أماكن كثير بتزبط هالمود، سواء نفسك بقطعة بيتزا، باستا طازة، أو عشا إيطالي كامل يخليك تحكي «ماما ميا» من أول لقمة.

جمعنالك أزكى مطاعم إيطالية بتستاهل تعرفها، لأنه الحياة أقصر من إنك تضيعها على صوص بندورة عادي.

لازم تجرب بيتزا نينا إذا بتحب مطاعم إيطالية. معروفين ببيتزا الساوردو السيشيلي والنابوليتان، وفي اهتمام واضح بالعجينة، المكونات وجودة النكهات. ومع القعدة الدافية والاستقبال الحلو، المكان أخذ مكانه عن جد بقائمة الأماكن اللي لازم تنحط عالبال.

لازم تجرب: بيتزا سيشيلي بيبروني دبل أب

جوستو بجيبلك النكهات الإيطالية الأصيلة من بيتزا رفيعة ومخبوزة على الحطب لخبز حرفي طازج معمول بعناية. المنيو محافظ على روح المطبخ الإيطالي التقليدي، ومع القعدة الدافية والمرتبة بصير العشا تجربة كاملة. يعني إذا نفسك بقعدة إيطالية مرتبة، غوستو خيار مضمون.

لازم تجرب: فروتي دي ماري

ثلاث فروع، ومهمة وحدة: يخلوك تحب الأكل الإيطالي من جديد. الباستا والبيتزا والصوصات عندهم طازة ومحضّرة من الصفر، والبيتزا عندهم عجينتها خفيفة ومنفوخة بطريقة بتخليك تكملها للآخر حتى لو شبعت. وزيد عليها بوراتا عالطرف وخلي العشا يحكي عن حاله.

لازم تجرب: بيتزا نابوليتانا

كليوز إييتري بأخذ الأكل الإيطالي لجو عصري ورايق، والمنيو عندهم أوسع من بيتزا وباستا وبس. مناسب للقعدة اللي كل واحد فيها نفسه بإشي مختلف؛ واحد بده كاربز، والثاني بده إشي أخف، والثالث أصلًا بلّش ياكل من صحون الكل. المشاركة مطلوبة، والحدود بين الصحون شكلها اختيارية.

لازم تجرب: فيتوتشيني ألفريدو

الاسم تقريبًا حكى كل شي. ليتل إيطالي بيتزيريا بقدّم بيتزا وباستا على الطريقة الإيطالية، من مارغريتا ومارينارا للكومبينشنز اللي فيها سلامي وجرجير، ديافولا، وفطر. المشكلة الوحيدة؟ مخك بكون خلص طلب ثلاث بيتزات قبل ما تقرر شو بدك.

لازم تجرب: بيتزا بيستو جينوفيزي

بادوفا بجيبلك طعم إيطاليا لعمان، والمنيو عندهم بضم سلطات، مقبلات وبيتزا، ومنها بيتزا بادوفا الخاصة فيهم. التركيز واضح على المكونات المختارة بعناية وعلى تجربة أكل إيطالية متكاملة. وبصراحة، البيتزا الزابطة ما بدها شرح كثير.

لازم تجرب: ريغاتوني باستا

روبرتو’s بأخذ العشا الإيطالي لجو أرقى، مع أكل إيطالي وقعدة أنيقة تجمع بين المطعم واللاونج. مناسب إذا عندك مناسبة، أو بدك تلبس وتطلع، أو حتى إذا حاسس إن يوم الثلاثاء بستاهل معاملة أحسن. الباستا هون إلها جو ثاني، خصوصًا وإنت عامل حالك بوسط ميلانو.

لازم تجرب: ريزوتو إل بوسكو

ذا لومبارد موجود بالغراند حياة عمّان وبقدّم أطباق من المطبخ الإيطالي الشمالي بطريقة مرتبة، مع اهتمام خاص بأطباق الريزوتو. الأكل محافظ على طابع الأكلات الإيطالية التقليدية، بس بتقديم أرقى ومناسب لقعدة مرتبة. يعني وصفات نونا أخذت ترقية درجة أولى.

لازم تجرب: ريزوتو آل ليموني

توسكانا كله عن الأكل الإيطالي الراقي، مع نكهات من مناطق مختلفة بإيطاليا وقعدة مرتبة بس بنفس الوقت مريحة. المنيو فيه أطباق إيطالية مع خيارات نباتية وخالية من الغلوتين، فحتى لو كل واحد عالطاولة عنده رأي مختلف بالعشا، في إشي إله. تعال جوعان، واطلع حاسس إنك عملت رحلة قصيرة لإيطاليا.

لازم تجرب: باكيري بيف راغو

دا عصمت موجود بشارع الرينبو وبقدّم أكل إيطالي ومتوسطي مع تأثير واضح من مطبخ روما ومنطقة لاتسيو. المنيو فيه باستا، ريزوتو، مأكولات بحرية وخيارات نباتية، يعني عندك كثير إشي تكتشفه غير طلب البيتزا المعتاد. مكان بيثبت إن الأكل الإيطالي والجو العمّاني بقدروا يزبطوا مع بعض بشكل ممتاز.

لازم تجرب: كانيلوني آل فورماجيو

---

بون ابيتيتو يا تبسترز!

حبّ اللّيمور،

فريق تيب ن تاغ