هاي لكل الناس اللي بحبوا يغيّروا جو للشغل وما إلهم خُلق يقعدوا ورا مكتب طول اليوم! بعمان في أماكن بتخلي اللابتوب والقهوة أحلى صحبة، سواء جاي تشتغل عنجد، تدرس، أو بس بدك تقنع حالك إنك منتج. من قعدات هادية تساعدك تركز، لأماكن فيها حركة ومنظر حلو يخلّيك تستحمل الديدلاين شوي أكثر، هاي أماكن بتقدر تشتغل منها براحتك… أو تماطل بسلام.

ساعات العمل: ٧:٠٠ الصبح – ١٢:٠٠ بالليل

إذا مكتبك المثالي لازم يكون معه قهوة مختصة مرتبة، ميلانج ممكن يخليك تعيد التفكير بمكتبك الأصلي. القعدات مريحة، والطاولات مناسبة للشغل، وفي واي فاي ومقابس كهربا، يعني كل اللي بدك إياه عشان تفتح اللابتوب وتبلّش. اختارلك قعدة، اطلب قهوتك، وخلينا نعيش وهم الإنتاجية شوي.

ساعات العمل: ٧:٠٠ الصبح – ١٢:٠٠ بالليل

الشبابيك الكبيرة، المساحة المريحة، والقعدات الكثيرة بتخلي إسبريسو لاب مناسب للي بدهم يشتغلوا من الكافيه. عندهم كمان مكان مخصص للشغل، غير القعدات الداخلية والخارجية إذا احتجت تغيّر جو بدون ما تترك قهوتك. بس انتبه، المكان ممكن يكون فيه حركة، يعني جوه إنتاجي وكافيه أكثر من إنه مكتبة ممنوع فيها النفس العالي.

ساعات العمل: ٧:٠٠ الصبح – ١٢:٠٠ بالليل

أحيانًا بدك مكان تحس فيه إنك طالع تشرب قهوة، مش إنك رايح على «جلسة عمل» رسمية ومعك لابتوب. نست عنده جو كافيه هادي ومريح، وبتقدر تقعد فيه وتشتغل بدون ما تحس إنك داخل على مهمة عسكرية. يعني حجة ممتازة تطلع من البيت، تطلبلك إشي، وتخلي الديدلاين يستنى شوي.

ساعات العمل: ٨:٠٠ الصبح – ١٢:٣٠ بعد نص الليل

عندك شغل بده قعدة طويلة؟ دالي جاهز لهالمهمة. سواء بتحب تشتغل برا وتاخد شوية شمس، أو تفضل تقعد على الطاولات العالية وتغيّر مكانك كل شوي، عندهم أكثر من خيار يخليك مرتاح. وكمان المنيو متوفر طول اليوم، عشان لما تركيزك يخلص قبل الشغل، الأكل يضل موجود ينقذك.

ساعات العمل: ٩:٠٠ الصبح – ١٢:٠٠ بالليل

كتاب معمول للناس اللي عندها دراسة وشغل وما بدها تقعد تدور على مكان تفتح فيه اللابتوب. في مساحة، واي فاي، قعدات مريحة وجو مناسب للشغل والدراسة، وعشان هيك صار خيار محبوب للطلاب والناس اللي بشتغلوا عن بعد. بس دير بالك من جملة «بقعد ساعة وبروح»… ممكن ترفع راسك تلاقي حالك بنص الليل.

ساعات العمل: ٩:٠٠ الصبح – ١١:٠٠ بالليل

إذا مكاتب الكووركينج الباردة بتعطيك نفس حماس صفحة وورد فاضية، فن وشاي عنده جو مختلف تمامًا. المكان شاي هاوس، جاليري ومساحة ثقافية، وفيه قعدات داخلية وخارجية وجو أهدى وألطف للشغل. تعال عشان الشاي، اقعد عشان الفن، وفجأة تلاقي حالك قضيت نص اليوم هناك… عادي، بتصير.

ساعات العمل: ٧:٠٠ الصبح – ١٢:٣٠ بعد نص الليل

مع القهوة المختصة، المعجنات والقعدات الواسعة، ألموند من الأماكن اللي الطلاب والفريلانسرز والناس اللي مكتبهم بحقيبتهم بعرفوها منيح. الجو مريح وبيخليك تفتح اللابتوب وتشتغل، وفي نفس الوقت حواليك حركة كفاية عشان ما تحس إنك محبوس بغرفة دراسة. وبصراحة، وجود كوكيز كبيرة قريب منك يعتبر حافز إنتاجي محترم.

ساعات العمل: ٨:٠٠ الصبح – ١:٠٠ بعد نص الليل
الخميس: ٨:٠٠ الصبح – ٢:٠٠ بعد نص الليل

الاسم لحاله بحكيلك شو القصة: المكان معمول للناس اللي وراها شغل. على شارع الرينبو، بتلاقي قعدة مخصصة للناس اللي بدها تفتح اللابتوب، تدرس، أو تخلص شغلها وهي بتحاول ما تفكر بالديدلاين اللي بتطلع فيها من الشاشة. وساعات العمل الطويلة بتناسب جماعة «أنا ما بشتغل منيح إلا بعد الـ٨»… اللي اختاروا الفوضى أسلوب حياة.

ساعات العمل: ٩:٣٠ الصبح – ١٢:٠٠ بالليل
الجمعة: ١٢:٣٠ الظهر – ٢:٠٠ بعد نص الليل

جوا المتحف الوطني الأردني للفنون الجميلة، جنغل فيفر من الأماكن اللي بتخلي حتى استراحة الشاشة إلها قيمة. الكافيه، البلكونة، الإطلالات والجو المناسب للشغل بعطوك شوية تغيير عن قعدة اللابتوب التقليدية، خصوصًا لما مخك يقرر فجأة إنه خلص، ما عاد يستوعب أي كلمة. خذ قهوتك، افتح اللابتوب، واستمتع برفاهية المماطلة بمكان حلو عنجد.

---

انبسط بشغلك!

Lemur Love,
The Tip n’ Tag Team