سواء كنت حاب تفطر براحة يوم جمعة، تغيّر جو بوسط الأسبوع، أو تلحق أصحابك بويكند هادي، عمّان مليانة خيارات بتناسب كل مود.
من ستيك هاوس أنيق، لهروب بحديقة خضراء، لقعدة عند المسبح، جمعنالك هون أبرز أماكن البرنش في المدينة — كل مكان بتميّز بجو خاص، أطباق لازم تتجرب، ولمسة بتخليه يعلق بالبال.

لو مزاجك رايق وبدك مكان كلاسيك يفهمك، بلو فيغ هو العنوان. قعدة حلوة، قهوة مزبوطة، وترّس بيفتح النفس… مثالي لنهار بطيء أو غدا خفيف.
لازم تجرب: منقوشة البيستو مع الحلوم – بسيطة، دسمة، ومشبعة بطريقة بتحسها مخبوزة بالبيت.

الأربعاء في سنترو مش يوم عادي – هو يوم للسباحة، الموسيقى، وسانجريا بتنعشك. أجواء رايقة، أكل ما بيوقف، و دي جي بيكمل المشهد.
لازم تجرب: سلايدرز للغدا و تشوروز مقرمشين للتحلاي، خصوصاً مع كاسة باردة بإيدك.

برنش الجمعة في سولت بشبه حفلة صغيرة. مقبلات بتلف، لحوم بتتقدم عالطاولة، وتحلاية بتيجي لطاولتك – ومع الكمان اللي بعزف، الأجواء راقية لأبعد الحدود.
لازم تجرب: خوض التجربة كاملة مع “ليزي سوزان” – طاولة دوّارة بتقدم كل إشي.

جايا من الأماكن اللي بتروح تفطر فيها، وبتلاقي حالك بعدها بكاسة سبريتز. الأجواء سلسة، الأكل زاكي، والمكان بيسحبك تضلّ.
لازم تجرب: توست السالمون مع الأفوكادو ما بيتفوت، وإذا ضليتك محلك، جرب بانكيك الريكوتا مع سبريتز عالخفيف.

السبت في سكابا مش بس برنش، هو غروب، موسيقى، حنة، وسانجريا. الناس جايين ينبسطوا، يرقصوا، ويستمتعوا بأجواء بوهيمية أنيقة.
لازم تجرب: خذلك كاسة سانجريا، اطلب كم لقمة، وخلي الجو يغلبك.

كرمز هو المكان اللي بيفهمك إذا مزاجك حلو أو مالح. قائمة مليانة نكهات، وجو كله راحة و رواق.
لازم تجرب: بانكيك البراولين بالشوكولاتة اذا جعبالك اشي حلو، أو فوكاتشا بالدجاج إذا جوعان عن جد.

بعيد عن الزحمة، ويلو مخبأ بحديقة هادية بتخليك تنسى المدينة. كل شي طازج، الجو ناعم، وكأنك على بريك صغير برّا الزمان.
لازم تجرب: التوست الفرنسي مع فواكه موسمية و الكراميل الساخن – جربه مع سكوب آيس كريم فانيلا، وما رح تندم.

---

برنش سعيد يا تيبسترز! 🥐☕
حبّ اللّيمور،
فريق تيب ن تاغ